LABBISKII CUSBAA EE IMBARAADOORKA. Qalinkii Hans Christian Andersen, tarjumiddii Garyq. Maxamed Axmed Cabdi Bacaluul

Garyaqaan Bacaluul. 

Bari hore waxa jiri jiray nin Imbaradoor ahaa oo labbiska cusub aad u jeclaan jiray, Dan kamuu lahaan jirin arrimaha taagan ee hadba lasoo darsa Imbaradooriyada uu xukumo, dagaallada lagu jiro, tirada ciidamadee kaga dhinta, iyo duruufaha nololeed ee ay la noolyihiin dadka uu u taliyo. Wuxuu dadka usoo bixi jiray uun maalinta uu xidho dhar cusub oo loo soo tolay. Waxa la sheegaa inay maalin walba dawaarlayaashu saf usoo gali jireen, si ay ugu soo bandhigaan hadba labbisyada ay faraha ka qaadaan. 

Maalin maalmaha ka mid ah waxa soo baxay oo imbaraadooriyada yimid laba nin oo u sheegtay inay yihiin dhartolayaashii ugu farsamada fiicnaa adduunyada, kuwaasi oo u yimid sidii ay Imbaradoorka ugu samayn lahaayeen labbis aan wali loo tolin boqor kale oo adduunyada ku nool.

Haddii ay u yimaadeen Imbaradoorkii, waxay u sheegeen inay u samayn doonaan dhar mucjiso ah, oo aanay harqadda laga tolayo oollin geyiga. Waa harqad aanay arki karin Maangaabka iyo cidkasta oo  imbaraadooriyadda ka haya xil  aanu u qalmin.

“Dharkani waaba mid la yaableh” ayuu ku yidhi imbaraadoorkii inta uu jalleecay halkii ay soo tubnaayeen Madaxyo-weyntiisii. Waxa uu Imbaraadoorku markaas ku fadhiyay Kursigii wuxuuna si fiican dhegta ugu raaricinayaa sheekada labada dawaarleh. 

 “Oo markaan sidaas u xidhaba waxaan ogaan doona raga ka tirsan Imbardooriyaddayda een u qalmin xilalka ay hayaan, maantaaban kala saari doonaa kooga caqliga badan iyo kooga doqonka ah, wax badanbay I halawsadeen oo ay qaar badan iskaga kay dhigeen talo-ruug ”

Imbaraadoorkii lacag ciiddaas leeg ayuu ku tisay labadii nin, si ay markiiba ay shaqada u bilaabaan. Iyaguna markiiba hawshii gale. Mid kamida oo iska dhigayay inuu harqaddii mucjisada ahayd sido, ayaa iska dhigay inuu miiskii ku kala fidinayo, kii kalana waxaabu mitirinayaa miiskii madhnaa, kadibna miiskii lalahaa haraaqbaa saaran ayuu qalin kolba dhan u dulmarinayaa isagoon taabsiinayn, hadana maqas ayuu hawada raacinaya, isagoo iska yeel-yeelay sidii nin kolba dacal soo qabanaya marad, oo hadana isku laabaya. kadibna wuxuu ula dhaqaaqayaa kii kale oo makiinaddii dawaarka dul fadhiyay. Waxay iska dhigeen kuwa mashquulsan.
 "dahabkii mee aan ku tolee,"
"waa tanee hoo",
"meeday xariirtii ugu qaalisanayd aan ku taxee", iyo waa kanee hoo.
Waxay  labadan xariif isku fid-fidinayaan waa faro madhan. Waxay se matalayaan dhaq-dhaqaaqii iyo wadashaqayntii ay lahaan jirtay, hawlkasta oo dhartolid ahi. 

Boqorkii oo doonayay inuu soo ogaado halka ay hawshu marayso ayuu hadana xasuustay sheekadii ahayd “Waxa labbiskan arki karaa uun kuwa u qalma xilka ay hayaan” Waxaabu ka baqay inuu isaga laftiisu arki kari waayo labbiskaasi. Wuxuu ka war-waray labiskaasi la sheegayay, ee ay cid waliba hadal hayso, ee lawada doonayo in lasoo bandhigo. Xataa dadkii jaararka ahaaba, isku carinaya, oo leh , inta labbiskaasi Imbaradoorku soo baxayaaba ka hadhsan, inta la ogaanayo doqonniimadaada.

Imbaradoorkii ay talo ku ciirtay, oo goonidiisa iskula hadlaya,
 "Waxaan u diri doonaa ninka ugu daacadsan, ugu waayo-aragsan, uguna caqliga badan la taliyayaashayda". Hadana wuxuu isweydiiyay ninkaasi kuu yahay, waxaanu si hoose isku leeyahay "Waa kuma ninka ugu macquulsan, ee la isla wada qirayo in aanay jirin cid kaga haboon xilkiisa?”

Dadkii ka ag dhawaa ee uu xilalka muhiimka ahaa uu u dhiibay ayuu maskaxdiisa kawada xaadiriyay, waxaanu ka dhex xushay ninkii u u diri lahaa Labis-tolayaasha. Odaygii caqli wanaagga iyo waayo-aragnimada loo tirinayay haddii uu tagay halkii loo diray, oo uu galay hoolkii ay labada xariif ay labbiska beenta ah ku tolayeen. Wuxuu arki waayay wax maro-sheegta oo meesha ka muuqata.

 “Mee wixii la sheegayay, ee ay lahaayeen waanu tolaynaa, hal dun ah oo ii muqataaba meesha ma taallee” ayuu cod hoose isku yidhi, isagoo indhaha galka kasoo saaray. Labadii khaayin, markay odaygii arkeen, ayaabay salaam iyo baashiraad kala horyimaadeen, hadal darandoori ah ayay loo boobeen. Odaygii ayaabay gacanta qabteen, iyagoo leh naga eeg labiskaanu tolnay, waxay dul keeneen miis dheer oo aanay waxba ka muuqan dushiisa. Mid kamida ayaa ku yidhi sug aan kala bixiyo labiska eh, kadibna intuu sidii oo uu wax ka dul qaadayo miiska ku foorarsaday, ayuu hadana sidii oo uu kor u hayo labiskiia ayuu gacmihiisa kor u qaaday, kadibna kala bixiyay. Kii kale oo hareer taagan, ayaa odaygii ku yidhii  "Bal eeg dharkaan tolnay ! ma ku cajabiyay midabkoogu? Ka warran luulka aanu luqunta iyo garbaha kaga taxnay? Ka warran sidaanu xariirtaasi ugu  jeeniqaarno koodhka"
"Miyaanay dunta midabkaasi leh idhaha soo jiidanayn !" 

Huuhaadii darandooriga ahayd, ayuu odaygu kolba mid is yidhaahdaa bal tanna arag, oo uu indhaha mar-marba ka dambaysa ku caddeeyaa halka madhan ee ay faruhoogu marayaan. 

“Yaah, oo kaallay ma sidan baa iga dhab ah” ayuu isyidhi, “ oo ma anaaba doqonkii la sheegayay noqday? Oo haddaan anigu arki waayay, yaa kalee arki doono toloow? Xataa anigu haddaan is ogaan waayay, oo ay caqliyaraan iga ahayd taasi, maxaan u waayay cid kale oo ogaata xisgaabnidayda? Xataa Imbaraadoorkana dhahoo? Markaas ma maantaan isfashilaa oon yidhaahdaa waxaan arkii waayay labbiskii mucjisada ahaa, maya isa sheegi maayo, oo odhan maayo waan arki kari waayay.

Nimankii oo eegaya odaygii oo isku maqan, wax jawaab ahna aan wali u celin ayuu mid ka mida raggii sugi waayay oo ku yidhi “ Xaaji miyaad la ashqaraartay labbiska, maxaa ku aamusiiyay, wali noomaad sheegin inaad la dhacday dharkan aanu Imbaradoorka u tolnay iyo in kale eh” isagoo dareenkiisa soo celinaya.

 “ Alla waa heer sare, waligayba maan arag kuwan oo kale” ayuu lasoo booday odaygii, isaga ood moodo inuu su'aasha ku ambabaray.

“Haa midabkaa aad sheegaysay ee sidaas ah ayaa Imbaradoorka maraya, Farshaxannimadiina waan hubaa inuu la dhici doono, markaan u sifeeyo. Bal iigu celi farshaxannimadii, aan isla sidaad u sharraxday ugu sharraxee”.

Haddiiba ay dib u bilaabeen, inay bandhigii ku celiyaan, wuxuu odaygii isku dayay inuu eray eray u xafido tilmaamihii ay ka bixinayeen Labiska ay diyaariyeen, Cabirradii, midabaddii, maryihii kale duwanaa ee ay ku kale taxeen, kuway ka luleen, liidadkay u samaynayeen iyo waxkastaba. Talooyinkii ay waydiinayeen, ee ay ku lahaayeen haddaanu halkaas sidaas ka dhigno ka warran, waabu ku raacay oo madaxuu u lulay.

Odaygii ku soo noqay Qasrigii Imbaradoorka, wax walbana ugu sheeg sidii loogu soo bandhigay. Imbaraadoorkii kumuu qancin sheekadii uu ka gurayay odaygii sahanka u ahaaye, wuxuu  hadana mid kale oo raggii uu garashada ku tuhmayay ka mid ah uu u diray, halkii labbisku ee ay hawshu socotay, si uu usoo hubiyo waxan uu odaygu ka warramay. Isna markii uu kusoo noqday, warkii odayga mid la mid ah ayuu u sheegay.

Imbaradoorkii oo is hayn kari la', doonayana inuu ka salgaadho warkan la siiyay, ayaa isasii daayay si uu usoo arko mucjisadan ay raggiisu isku raaceen. Wuxuu kaxaystay labadii nin ee u akiday inay soo arkeen labbiskii oo diyaarsan, iyo dhawr nin oo uu kaga kalsoonaa inta kale. Markay arkeen Nimankii dhartolayaasha ahaa Imbaradoorkii oo xaggooga usoo socda, ayay iska dhigeen kuwa mashquulsan oo laab-laabaya Labiskii beenta ahaa.

Miyaanay farsamadoodu cajiib ahayn ayuu yidhi” mid kamida raggii sahanka ahaa ee hore loosoo diray.  “Haddii aad Mudane aragtid, sida layaabka leh ee ay waliba kuugu qiyaaseen, una garteen dookhaaga, wax kale ka sheekayn maysid baryahan”.

Imbaradoorka laftiisiiba, ayaa wajiga isgaliyay oo is yidhi “Waa sidee !” “ Oo ma anigaaba noqday kii la sheegay een arki karayn labiska, een xilkiisa u qalmin.

 "Maya" inta uu dhoolla caddayn been ah muujiyay ayuu isagoo jaahwareersan ku dhawaaqay

"Alla, waar cajiibsanaa !
waligayba maan arag cid sidan wax u tosha, tolmihiinu waa heersare”

"Sidaasaaban ku aqbalay, oon idinkaga guddoomay” Ayuu raaciyay imbardoorkii, isagoo wali indhaha ku haya, halkii looga tilmaamay inuu Labiska ku diyaarsanyahay.  Midkastoo la socday wuxuu indhaha ku mudayaa halkii madhnayd, isagood moodo inuu  indhahiisa qasab kaga doonayo inay tusaan waxaan meeshaba oollin. Midbaaba mar-maranaya indhaha, oo haddana markuu ka war helo mid kale oo hoosta ka eegaya , isku naxaya oo odhanaya "Labbiska widh-widhkiisa ayaa indhaha iga qabtay".

Boqorkii ayay ku yidhaahdeen bal isku eeg, kadibna inta uu iska bixiyay maryihii uu xidhnaa, oo isku soo reebay intuu hoosta ka gashanaa, ayay labadii xariif iska dhigeen, kuwa u galinaya Labbiskii beenta ahaa, Wuxuu mid kamida labadan tuug iska dhigayaa mid kolba soo qabanaya waxa loo baahanyahay ee Imbaradoorka loo xidhayo, halka uu kan kalena uu iska yeel-yeelayo sidii mid kolba u galinaya shayga loo dhiibayo. oo waxaabu leeyahay kolba gacan keen, haddan lug keen. Haddii Koodhkii loo xidhay, iskaafkii oo u dambeeyayna luqunta uu ugu duubay, ayuu dib uga baxay oo iska dhigay mid eegaya sida uu ugu soo baxayImbaraadoorku labiska cusub.

“Cajabeey, bal hannaanka iyo haybadiisa eega” ayuu ku yidhi nimankii Imbaradoorka la socday. 

Wuxuu Imbaraadoorkii u soo kexeeyay qol ay darbiyadiisa ku xidhantahay Muraayad weyni oo la isku arki karo dul iyo hoos, oo sii jeed iyo soo jeedba iskaa tusaysa. Markii uu qolka soo galay ee uu isha qac ku siiyay humaagiisa, ayay naxdintii meeli go’day, wuxuu se dib usoo uririyay naftiisii ay ‘ku baahday’, kuna dadaalay sidii aan dareenkiisa iyo jaahwareerkiisa muraayadda looga dhex arki lahayn. Isaga oo isdiidsiinaya muuqalkiisa dhabta ah ee ka hormuuqda waxa uu bilaabay inuu kolba dhinac iskaga eego muraayadda, isaga oo wer-wekiisa ku qarinaya qosol aan ka tarjumayn xaaladdii uu saacaddaasi ku sugnaa. 

Ma jiro qof qudha oo intii meesha joogtay kamida, oo qiran kara in aanu arkayn Labiskan beenta ee la leeyahay Imbaradoorkaa loo xidhay, waayo waxay ka baqayeen inay xilkooga waayaan, ama ay halkaasi ceebi ka raacdo. 

Iyagoo oo wali meeshii jooga, ayuu dibadda uga baxay uugaan iyo sawaxan xooggani, waaba magaaladii oo oodaheedii wadata, Markii ay dadku maqleen in Imbaradoorkii uu labiskii mucjisada ahaa soo gashanayo, ayaabay sugi kari waayeen, una soo baratameen halkii dharka lagu diyaarinayay. 

Labdii khaayin, ayaa Imbaradoorkii kula taliyay inuu u soo baxo dadka, oo uu la dhexmaro Labiskan mucjisada ee ay u xidheen.

Naxdin weynaa !

Imbaraadoorkii ayay talo ku ciirtay. Waxaana loosii galbiyay xaggii dadku ku xoonsanaa, isagoo qaawan oo sidii uu ku soo dhashay ah balse lagu qanciyay inuu xidhanyahay Labbis aanay doqonniimadu arki karin. Wuxuu dhex lugaynayaa jidadka waaweyn ee Magaalada, isagoo raxan daawadayaal ah iyo ilaaladiisii daba guurayso oo luqunta taagaya oo aanay kaba qasnayn. Dadweynuhu - carruur iyo cirroolaba, rag iyo dumarba waa in daba ugaamaysa iyo in hareero tuban jidadka  Magaalada. Kolba inta uu hormarayo ee safka taagan waxa ay ku dhawaaqayaan "Qurux badanaa Labbiska Imbaradoorku” iyada  oo qof kastaaba isdaadraacinayo dhawaaqa baxaya, naftiisana hafraya. Kalmaddaasi oo ay labadii Xariif dadka afka ugu rideen judhii horaba markii ay boqorka u soo saareen dadweynaha.

 “Oo ma isagaa waxba xidhanba?" oo cod dheer ah, ayaa laga dhex maqlay dadka dhexdiisii. Waxa ay taasi ka soo yeedhay gabadh da'deedu aad u yartahay oo aabaheed gacanta hayo dareenkii dadka ayay weedhaasi soo wada jeedisay. Bal dhagaysta wuxuu sabigan yar een dambiba lahayni waxa uu ku dhawaaqay? ayuu yidhi Aabaheed isagoo ku faanaya yartiisa. Maxay tidhi? ayuu ku kale ku dhawaaqay, Dadkii ka ag dhawaa ee maqlayay oo u jawaabaya, ayaa hal mar ku wada dhawaaqay:

“Ma isagaa waxba xidhanba”

“Ma isagaa waxba xidhanba” 
"Ma isagaa waxba xidhanba"

Imbardoorkii ayaa isku yax-yaxay, oo naxdin iyo khajilaad la gariiray. Gartayna inay run tahay waxay dadku sheegayaan, oo uu Qaawanyahay. Balse wuxuu go'aansady in uu iska xamilo illaa inta lala soo gaadhayo Kursigii Qafilnaa ee qasriga lagu geyn jiray. 

               [  Dhammaad ]

..............................       ...........       .....................         ..................       ..................     .................   .................

Waa kuma Hans Christian Anderson?

Waa Qoraa dhaanish ah, oo noolaa Qarnigii 19-aad, waxa sheekadan mala’awaalka ah suugaan ahaan  loogu tarjumay in ka badan 100 af. Waxa la  daabacay, lana faafiyay 1837-kii. Walaw tarjume ahaan, aanan  sheekadan hab suugaaneed, oo farshaxaysan oo u dhaw-dhaw sida loogu tarjumay afka Engiriisiga ee aan ku akhriyay aanan u tarjumin, amaba aanan usoo bandhigin sida uu qoraagu ugu nuux-nuuxsaday humaagaynteeda, waxaan jeclaystay uun in aan inta afsoomaaliga wax ku akhrida la wadaago. Sidoo kale meeris-meeris umaan raacin qoraalka sheekada, waxaan se afsoomaali ahaan kusoo  koobay dhacdooyinka si nuxurkeeda hore loogu gaadho. Waxaanan ka cududr daaranayaa akhristaha in aanan waqti badan oo ay mudnayd tabinta  sheekadani aanan galin.. 

Tarjume: Maxamed Axmed Cabdi Bacaluul.

GOLAHII WASIIRADII HORE OON XILKA LAGA QAADIN, MIYAA LAGU DUL MAGACAABI KARAA WASIIRO CUSUB ? (FAALLO) BY GARYAQAAN MAXAMED AXMED CABDI (BACALUUL).

Garyaq. Maxamed Axmed Cabdi Bacaluul. 

Iyadoon wasiiradii Hore xilka laga Qaadin, ayuu Madaxweynaha cusubi magacaabay Liis cusub oo wasiiro ah. Waxay ahayd in uu Madaxweynihii hore ama kan cusub uu  dikreeto Guud oo Madaxweyne uu ku kala diro Golihii Wasiiradda ee Hore (Dissolution of Cabinet),  kadibna cidduu  dib usoo magacaabayo, usoo magacaabo. Wasiiradu waxay wasiiro u ahaayeen Qaranka, oo loo magacaabay (Gole Dastuuriya),ee may ahayn Shaqaale gaar ah oo qasriga la socday, oo raacaya xil-wareejinta Madaxtooyada.

Xilka wasiiraduna ma ah mid xilliyaysan (Fixed term),balse waa mid ku xidhan rabitaanka Madaxweynaha markaasi talada haya. Kaasi oo noqon kara kii soo magacaabay ama mid kale oo talada kala wareegay, Xilkaqaadistaasina, waa tan qudha ee soo raaci karta asbaabaha kale ee alaaba xilka lagu waayo,

Asbaabahaasi kale een ahayn xilka-qaadista bilaa shuruudda ah (dismissal at pleasure), ee xilka lagu waayi karo sharci ahaan waa kuwo ku yimaadda xaalad ka baxsan xil-hayaha (e.g. Dhimasho, xanuuno maskaxeed/jidheed).  kuwo iskiis uga yimaadda xil-hayaha (eg. Is-casilaad), iyo kuwo sababaysan oo ka yimaadda cid kale oo awood ahaan ka sarraysa xil-hayaha (sida, Eryid anshax-marin ah ama maamuus ka xayuubin).  

Hadaba sidaan hore u xusay ma jiro xeer baarlamaan oo nidaaminaya qaabka loo marayo hannaanka xilwareejinta awoodda, doorashooyinka kadib. Sidoo kale ma hayno Qodob Dastuuriya oo si cad u qeexaya inay Xil-wareejinta Madaxweynuhu soo afjarayso Golihiisii wasiirada. Wuxuu se Qodobka 94(2) ee Dastuurku inoo sheegayaa in xilka wasiirnimo lagu iman karo magacaabis madaxweyne oo Golaha wakiiladu ansixiyay laguna waayi kara uun Xilka-qaadista Madaxweynaha. Haddii ay jiraan kuwo qaba doodda ah in xilka Golaha Wasiiradu uu ku xidhanyahay kan Madaxweynaha, oo marka uu xilka wareejiyo ayuu xilkoogu wasiirnimana dhammaanayaa, ha keenaan waxay sharci ahaan taas u cuskanayaan.

Haddiise xataa toodaba loo raaco, oo lala qaato inay Xilalkii wasiiradu ku xidhanyihiin xilka Madaxweynaha ay xukuumaddiisa ka tirsanyihiin, miyayna taasi ka dhignayn  Iscasillaadda Madaxweynahana mid si autumatik ah meesha uga saaraysaa xilalkii wasiirada?

Taasina waa sababta aan dooddaasi isku xidhaysa xilka madaxweynaha iyo kan Golihiisa wasiirada uga soo horjeedo. Waxaanan qabaa inuu Golaha Wasiiradu yahay hay'ad dastuuriya oo iskeed u jirta (Qodobka 94/1 ee Distoorka JSL). Madexweynahaana awood u leh sida loo qaabaynayo Wasaaradaha(restructuring) iyo Magacaabista wasiiradoodaba, Balse Hay'ad ahaan Wasaaraddu waa Waax gacan ka siinaysa hawlaha kala duwan ee Madaxweynuhu Qaranka u hayo. Taasi oo xataa haddii isagu xilka ka tago, aan shaqadii ay qaranka u haysay meesha ka saarayn. Waana sababta uu Wasiirku, wasiir usii ahaanayo illaa inta xilka sidii loogu magacaabay looga qaadayo, ee aanu, u ahayn Shaqaale gaar ah oo Madaxweynaha shanadadaha usii qaadaya, albaabkana kala baxaya marka uu ka dhammado xilka madaxweynanimo.

LA TALIYIHII HORE TRUMP EE AMNIGA QARANKA, MICHEAL FLYN OO QIRTAY XIDHIIDHO UU RUUSHKU LA SAMEEY. Lafagurkii Garyaqaan Maxamed Axmed Cabdi Bacaluul

Muxuu Qiraalkani kusoo kordhin doonaa baadhistii uu waday Dalka Marykanku ee la xidhiidhay Farogalintii Ruushka iyo Doorashooyinkii Madaxtooyada?

Michael Flynn oo kasii baxaya Maxkamad Washington ku taala

Su’aasha ku saabsan In uu maamulka Trump amaba ay qaar kamid ahi xidhiidh hoose la sameeyeen Dawladdii Ruushka, ayaa ah arrinta uu Maraykanka baadhisteeda ku hawlannaa waayadan dambe. Su’aashaasi oo shaki iyo dareen kala galisay Shacabkii Maraykanka iyo Maamuulkii cusbaa ee ay doorteen, ayaan illaa maanta laga wada gungaadhin. Waxaan Qoraalkan ku lafaguri doono qiraalkii uu maalmahan u dambeeyay sameeyay Micheal Flynn oo hore wax looga weydiiyay arrimahaasi. Michael Flynn oo ahaa lataliyihii Amniga Qaranka ee Madaxweyne Trump, ayaa hore  loogu aanaynayay inuu xidhiidh la yeeshay Saraakiil matalayay dawladda Ruushka  intii aanu Trump Aqalka Cad ku wareegin. Walaw uu dafiray eedaymahaasi markii hore, wuxuu haddana gor-gortan uu la galay Xeer-ilaalinta kadib ogolaaday inuu Qirto Xidhiidhkaasi  maalmahan u dambeeyay. 

Qiraalka uu dhawaan sameeyay Micheal iyo wadashaqayntan uu maanta kula heshiiyay (Plea bargaining) in uu la yeelanayo Garyaqaanka gaarka ah, Rober Mueller iyo Kooxda uu hoggaaminayo ee loo xilsaaray Baadhitaanka ku saabsan inay jiraan Xi dhiidho dusmo ah oo ay wada yeesheen kooxdii la shaqaynaysay Trump iyo Ruushku, intii uu socday ololaha doorashooyinka ee Madaxtinnimadu sannadkii hore.  

Dokumantiyada Maxkamadda ayaa ku tusaya inuu baadhitaanka la wadaa aanu ku eekayn Mr Flynn, balse uu isha ku hayo meelo ka sarreeya.  Qiraal dambiyeedkaasi oo uu la sodo heshiiska gor-gortan ee Flynn iyo X/Ilaalintu wada galeen,  ayaa sheegaya, inay jiraan shaqsiyaad xilal-sare hayay oo kamida Guddidi Xilwareejinta ee Trump,  oo wax ka ogaa Xidhiidhkii dhexmaray Flynn Safiirka Ruushka, Sergey Kislyak. Xidhiidhadaasi oo uu Flynn kala hadlay Safiirka, Mooshinkii Golaha Ammaanka  horyaallay ee ay ujeedadiisu ahayd in Qaraar lagu Cambaaraynayo Deegaamaynta ay Yuhuuddu ka wado dhulka ay haysato ee Falastiin lasoo saaro. Qaraarkaasi oo ay cod-u-qaadistiisu ku muddaysnayd 23 December, 2016. 

Hadaba Qiraalkan uu bixiyay Flynn wuxuu noqonayaa mid ka hor imanaya warsaxaafadeedyadii Aqalka Cadi ku adkaysan jiray ee sheegi jiray in aanay jirin xidhiidho qarsoon oo ay madaxtooyadu ogtahay oo si qarsoodiya loola saameeyay Ruushka. 

Sidoo kale Su’aasha ka dhalanaysa qiraalkan Flynn  ayaa noqonaysaa, Illaa intee ayuu Donald Trump wax ka ogyahay xidhiidhka dhexmaray Lataliyihiisa Amniga Qaranka iyo Ambassador Kislyak. Haddii uu Trump wax ka ogaa xidhiidhyadaana, waxay tani sii iftiimin doontaa sababta uu Trump uu doonayay in baadhista ay FBI-du ku hayso Michael Flyn laga joojiyo. Taasi oo uu madaxweynuhu si toos ah ugala hadlay Agaasimihii FBI-da, David Comey una soo jeediyay inuu baadhistaasi soo afjaro.  Markii ay taasi dhici waydana uu markii dambe madaxweyne go’aansaday xilka-qaadista  Agaasimahaasi, iyo Sally Sates oo matalayay Xeerilaaliyaha Guud oo isna shaki badan Ka muujiyay arrimahaasi loo aanaynayo Flynn. 

Marka lagu soo noqdo Sida uu u yaallo Warbixin Qiraaleedka  uu sameeyay Flyn, kaasi oo uu ku sheegayo inuu Safiirka Ruushka kala hadlay codbixinta uu Golaha Ammaanku u qaadi doono, Qaraarka lagu Cambaarayndoono Deegaamaynta Israil. Waxaanu qiraalku sheegayaa “ a very senior Member” oo micnaheedu noqonayo “sarkaal Xubin sare ah” oo kamida Xubin ka ah Tiimka Xil-wareejinta  ayaa “ ku amray Flynn inuu la xidhiidho saraakiil ka matalaya Xukuumado shisheeye” si uu, ugu qanciyo inay ka codeeyaan Mooshinkaasi, ama ay dib u dhigaan  Cod u qaadistiisa. 

Hadaba markaasi uu socday wadahalka u dhexeeyay Flyn iyo Kislyak , Flyn wuxuu usii magacwanaa inuu noqdo Lataliyaha Ammaanka Qaranka ee Maamulka cusub. Waxaanay magacaabistaasi ka dhigaysaa inuu Flynn kamid noqonayo shaqsiyaadka haya  Xilalka ugu awoodda badan ee dalka Maraykanka, lana odhan karo in yar oo kooban ayaa ka sarrayn karta ama gaadhi karta heer ay amarro siiso.

Marka laga reebo Donald Trump, shaqsiyaadka goor hore magacawnaa ee awooddaasi lahaan karayay waxa kamida,  Jared Kushner (inanka uu soddoga Madaxweynuhu u yahay) oo isna ahaa Lataliye, isla markaana uu madaxweynuhu u doortay in uu kamid noqdo Kooxdii ka gacansiinayay Siyaasada Barriga Dhexe . Jaraaidka qaar oo ay kamid tahay Bloomberg iyo Washington Post ayaaba kusii sheegay in uu sarkaalkaasi sare een magiciisa la xusuni yahay Kushner. 

Kushner ayaa la ogyahay isna inuu door muhiima ka qaatay arrintaasi Deegaamaynta Israail ee Golaha Ammaanka hortaallay. Olalahaasi oo lagaga soo horjeeday in loo codeeyo Qaraarkaasi Cambaaraynaya Israaiil. Madaxweyne Obama, ayaa isagu go’aansaday in uu ka gaabsado Ololahaasi iyo Codayntaasi, kadib markii dhawr jeer oo uu isku dayay inuu Dawladda Israail ku qanciyo Joojinta Deegaamaynta ay ka wadday Dhulka Lagu muransanyahay ee Falastiin, uu ku guuldarraystay; Maamulka Israelna uu ka dhego-adaygay soojeedimihiisii. 

Guntii iyo gabo-gabadii Qiraalkan uu sameeyay Flyn , wuxuu tilmaamaya suurtogalnimada in la qaadi doono tallaabooyin sharci oo kale. Madax dhawr ah oo arrimahani oo FBI-du wax ka waydiisay  xaqiiqada xidhiidhadaasi hoose , ayaa ku cel-celiyay kuna adkaystay in aanay waxba kala socon. Amaba ku adkaystay in aanay ogayn wax xidhiidh ah oo ay habayaraatee wada sameeyeen kuwii u ololaynay Trump, ama kuwii  qaban-qaabinayay Xilwareejinta iyo saraakiil matalaya Dawladda Ruushku.  Hadddaba, haddii  su’aalaha la waydiinayo Flynn ay daaha ka rogaan magacyo kale , oo kamida kuwaasi hore FBI-da ugu sheegay in aanay waxba arrimahaasi Ruushka kala socon,  waxay kuwaasi noqon doonaan qaar aan  ka baxsan doonin  inay Xeerilaalintu kusoo oogto dacwado ciqaab ah oo ay kamid noqon doonaan faldambiyeedyada  Beenku-dhaarasho ama marag-fur been ah (Perjury) iyo Is-hortaag Caddaaladeed (obstruction of Justice).

MUSUQ-MAASUQA IYO DOORASHOOYINKA; HALKAY ISLA MARAYAAN AFRIKADA SAXAARAHA KA HOOSAYSA? by Garyaq Maxamed Axmed Cabdi Bacaluul.

Garyaq. Bacaluul. 

Waxaynu qormadan kooban ku eegi doonaa, Kaalinta ay doorashooyinku ku leeyihin isbaddalada ay Doorashooyinku ku yeesheen Qaaradda Afrika, gaar ahaan dalalka Saxaaraha Afrika ka hooseeya. Qormadan, oo aan ka tixraacay Warbixintii ugu dambaysay ee ay Soo saartay hay'adda Caalamiga ah ee Qiimeysa Heerarka uu Maamulwanaagga iyo Madaw-madaw la'aanta Nidaamyada Xukuumadeed ee dawladaha adduunku ay kolba taaganyihiin.

Shucuubta dalalkan ayaa la dareemayaa inay Musuq-maasuqa u aqoonsadeen, in uu yahay halka ay ku arooraan dhibaatooyinka sababay dib-u-dhaca nololeed ee ay ku noolyihiin. 

Kahor intaynaan taas gudo galin, waxay eegi doonaa  sida uu u shaqeeyo Halbeeggan Caalamiga ah ee lagu Qiyaaso halka uu marayo musuq-maasuqa ka jira dawladuhu. 

Marka aynu Ka hadlaynu heerka uu musuq-maasuqa marayay sannadkii tagay, ma jiro la dal qudha oo adduunyada la odhan karo wuxuu gaadhay ama illaa xad u dhawaaday heerkii ama dhibicdiii ugu sarreeyay ee la doonayay inay dawladaha caalamka ka gaadhaan, Maamul-wanaagga iyo La-dagaalanka Musuq-maasuqa. In ka badan laba meeloodoow saddex 2/3 oo kamida 176 dal, ayaa hoos maray halka badhtamaha u ah halbeeggaasi la isla qaatay in lagu qiimeeyo sida ay dawladuhu ula tacaalaan Musuq-maasuqa.

Heer-qiyaaseedkaasi oo lagu qiimeynayo dadaalka ay dawladuhu ku xakameeyaan musuq-maasuqa ayaa ka bilaabmaya eber (0) oo u taagan dadaalka ugu yar (musuq-maasuqa ugu badan). Halka  uu boqolkuna (100) uu yahay darajada ugu sarraysa ee tilmaamysa dadaalka ugu badan ee musuq-maasaq la dagaalanka, amaba la odhan karo waa darajada Musuq-maasuq la'aanta (Nadiifnimadu) ee Qaran gaadho. Waxaan cel-celis ahaan la isla qaatay in aan laga hoosayni inuu yahay saddex iyo afartan (43). Heerkaasi oo tilmaamaya inuu musuq-maasuqu si baahsan oon qarsoodi ahayn uga jiro dhammaan hay'adaha iyo laamaha Maamul ee ay dawladi leedahay.  Waxaanad ku arkaysaa Jaantuska 1-aad inay  Wadamada ugu dhibcaha badan, ee nadiifnimada ama musuq-maasuq yaraanta gaadhay oo ah kuwa ku midabaysan huruud ay aad uga tiro yaryihiin, dalalka ku midabaysan liimiga (orange-coloured), oo tilmaamaya meelahay ay muwaadiniintu sida caadiga ah la kulmaan Saamaynta musuq-maasuqa. 

Dalalka Halbeegga qiimaynta meesha hoose kaga jira, waxay ku caan yihiin inay hay'adahooga u adeega bulshadu (eg. Bilayska iyo Garsoorku), ay yihiin kuwa aan daacadnimadooda la isku hallayn karin oo aan sidii la rabay shaqaynin. Xataa haddii ay dawladahani leeyihiin xeerar lagula tacaalo musuq-maasuqa, sharciyadoodaas maaha wax dhaafsiisan buugaagta ay ku qoranyihiin, oo lagu camal falo. Muwaadiniinta ku nooli dalalkaasina ee adeeg-sugayaasha ahina, waa kuwa aanay waxba u socon karin illaa ay laaluush bixiyaan (bribery), amaba baad (extortion). Waxaanay taasi ugu wacan, iyadoo dhaqaalihii loogu talogalay inay xafiisyadu ku adeegaan ay leexsadaaan madaxda sar-sare. Haddii xataa ay muwaadiniintu isku dayi lahaayeen, inay ka cawdaan laaluushkaasi ama baaddaasi, oo ay u gudbisan lahaayeen Hay'adaha Ku shaqada leh, waxay ogyihiin in ay cabashadaasi lafteedu ay ku tagayso kharash ka badan kii hore ee ay ka cabanayaan, amaba uu waqti badan kaga lumayo intay ka dhursugayaan.

Wadamada ay darajadoodu sarrayso (Highly-ranked), waxa astaan u ah oo lagu gartaa waa heerka ay saxaafaddoodu ay ka madax-bannaantahay saamaynta iyo cabsi kaga timaadda kuwa awoodda haysta amaba Dhaqaalaha iyo Illaa heerka ay hay'adaha Dawladdu ay daaha-ka-qaadi karaan sida ay u kharash-gareeyeen dakhli miisaaniyadeedkii loo qoondeeyay. Daahfurnaantaasi oo macnaheedu yahay in ay si iskooda oo waqtiyaysan ugu warceliyaan cashuurbixiyayaashii, iyo inay leeyihiin nidaam furan oo si sahlan u siin kara, muwaadiniinta xog-raadiska ah, sida Cilmi-baadhayaasha, Suxufiyiinta,  iyo cidkasta oo danaynaysaba.

Muwadiniinta dawladahani heerka-sare taagani, waxay sii ogyihiin shuruudaha ama waxyaabaha laga rabo markay rabaan adeeg-dawladeed. Sidaa darteed ayaa hadday buuxiyaan shuruudaha  uu nidaamku farayo, aanay ahayn kuwa ka war-wara in si sabab la'an ah loogu diido, ama lagu caansiiriyo adeeggay xaqa u lahaayeen. Sidoo kalana, Suurtagal ma aha inay Madaxda dawladahani ay hoos u galaan qandaraasyo sir ah, ama saamiyo qarsoon ku yeeshaan shirkado jira ama cusub, iyagoo ka faa'idaysanaya awooddii qaranku siiyay (Conflict of Interest). Waxa kale oo mustaxiil ah in uu Sarkaal Xukuumadeed uu si aan la fahmi karin uu ku helo una  keydsado lacago ka badan dakhligiisii caadiga ahaa (Illicit funding).

Transparency International 2016 report: Jaantuska 1-aad

Heerka ay dalalku kaga jiraan Xakamaynta Musuq-maasuqa Maamulkooga  (2012-2016kii)/ Source: Transparency international 2016

Rank 1	Country Denmark			2016  90	2015  91	2014  92		2013  91	2012  90	Region     Europe and Central Asia
1	New Zealand			90	91	91		91	90	Asia Pacific
3	Finland			89	90	89		89	90	Europe and Central Asia
4	Sweden			88	89	87		89	88	Europe and Central Asia
5	Switzerland			86	86	86		85	86	Europe and Central Asia
6	Norway			85	88	86		86	85	Europe and Central Asia
7	Singapore			84	85	84		86	87	Asia Pacific
8	Netherlands			83	84	83		83	84	Europe and Central Asia
9	Canada			82	83	81		81	84	Americas
10	Germany			81	81	79		78	79	Europe and Central Asia
10	Luxembourg			81	85	82		80	80	Europe and Central Asia
10	United Kingdom			81	81	78		76	74	Europe and Central Asia
13	Australia			79	79	80		81	85	Asia Pacific
14	Iceland			78	79	79		78	82	Europe and Central Asia
15	Belgium			77	77	76		75	75	Europe and Central Asia
15	Hong Kong			77	75	74		75	77	Asia Pacific
17	Austria			75	76	72		69	69	Europe and Central Asia
18	United States			74	76	74		73	73	Americas
19	Ireland			73	75	74		72	69	Europe and Central Asia
20	Japan			72	75	76		74	74	Asia Pacific
21	Uruguay			71	74	73		73	72	Americas
22	Estonia			70	70	69		68	64	Europe and Central Asia
23	France			69	70	69		71	71	Europe and Central Asia
24	Bahamas			66	N/A	71		71	71	Americas
24	Chile			66	70	73		71	72	Americas
24	United Arab Emirates			66	70	70		69	68	Middle East and North Africa
27	Bhutan			65	65	65		63	63	Asia Pacific
28	Israel			64	61	60		61	60	Middle East and North Africa
29	Poland			62	63	61		60	58	Europe and Central Asia
29	Portugal			62	64	63		62	63	Europe and Central Asia
31	Barbados			61	N/A	74		75	76	Americas
31	Qatar			61	71	69		68	68	Middle East and North Africa
31	Slovenia			61	60	58		57	61	Europe and Central Asia
31	Taiwan			61	62	61		61	61	Asia Pacific
35	Botswana			60	63	63		64	65	Sub Saharan Africa
35	Saint Lucia			60	N/A	71		71	71	Americas
35	Saint Vincent and the Grenadines			60	N/A	62		62	62	Americas
38	Cape Verde			59	55	57		58	60	Sub Saharan Africa
38	Dominica			59	N/A	58		58	58	Americas
38	Lithuania			59	59	58		57	54	Europe and Central Asia
41	Brunei			58	N/A	N/A		60	55	Asia Pacific
41	Costa Rica			58	55	54		53	54	Americas
41	Spain			58	58	60		59	65	Europe and Central Asia
44	Georgia			57	52	52		49	52	Europe and Central Asia
44	Latvia			57	56	55		53	49	Europe and Central Asia
46	Grenada			56	N/A	N/A		N/A	N/A	Americas
47	Cyprus			55	61	63		63	66	Europe and Central Asia
47	Czech Republic			55	56	51		48	49	Europe and Central Asia
47	Malta			55	60	55		56	57	Europe and Central Asia
50	Mauritius			54	53	54		52	57	Sub Saharan Africa
50	Rwanda			54	54	49		53	53	Sub Saharan Africa
52	Korea (South)			53	54	55		55	56	Asia Pacific
53	Namibia			52	53	49		48	48	Sub Saharan Africa
54	Slovakia			51	51	50		47	46	Europe and Central Asia
55	Croatia			49	51	48		48	46	Europe and Central Asia
55	Malaysia			49	50	52		50	49	Asia Pacific
57	Hungary			48	51	54		54	55	Europe and Central Asia
57	Jordan			48	53	49		45	48	Middle East and North Africa
57	Romania			48	46	43		43	44	Europe and Central Asia
60	Cuba			47	47	46		46	48	Americas
60	Italy			47	44	43		43	42	Europe and Central Asia
62	Sao Tome and Principe			46	42	42		42	42	Sub Saharan Africa
62	Saudi Arabia			46	52	49		46	44	Middle East and North Africa
64	Montenegro			45	44	42		44	41	Europe and Central Asia
64	Oman			45	45	45		47	47	Middle East and North Africa
64	Senegal			45	44	43		41	36	Sub Saharan Africa
64	South Africa			45	44	44		42	43	Sub Saharan Africa
64	Suriname			45	36	36		36	37	Americas
69	Greece			44	46	43		40	36	Europe and Central Asia
70	Bahrain			43	51	49		48	51	Middle East and North Africa
70	Ghana			43	47	48		46	45	Sub Saharan Africa
72	Burkina Faso			42	38	38		38	38	Sub Saharan Africa
72	Serbia			42	40	41		42	39	Europe and Central Asia
72	Solomon Islands			42	N/A	N/A		N/A	N/A	Asia Pacific
75	Bulgaria			41	41	43		41	41	Europe and Central Asia
75	Kuwait			41	49	44		43	44	Middle East and North Africa
75	Tunisia			41	38	40		41	41	Middle East and North Africa
75	Turkey			41	42	45		50	49	Europe and Central Asia
79	Belarus			40	32	31		29	31	Europe and Central Asia
79	Brazil			40	38	43		42	43	Americas
79	China			40	37	36		40	39	Asia Pacific
79	India			40	38	38		36	36	Asia Pacific
83	Albania			39	36	33		31	33	Europe and Central Asia
83	Bosnia and Herzegovina			39	38	39		42	42	Europe and Central Asia
83	Jamaica			39	41	38		38	38	Americas
83	Lesotho			39	44	49		49	45	Sub Saharan Africa
87	Mongolia			38	39	39		38	36	Asia Pacific
87	Panama			38	39	37		35	38	Americas
87	Zambia			38	38	38		38	37	Sub Saharan Africa
90	Colombia			37	37	37		36	36	Americas
90	Indonesia			37	36	34		32	32	Asia Pacific
90	Liberia			37	37	37		38	41	Sub Saharan Africa
90	Morocco			37	36	39		37	37	Middle East and North Africa
90	The FYR of Macedonia			37	42	45		44	43	Europe and Central Asia
95	Argentina			36	32	34		34	35	Americas
95	Benin			36	37	39		36	36	Sub Saharan Africa
95	El Salvador			36	39	39		38	38	Americas
95	Kosovo			36	33	33		33	34	Europe and Central Asia
95	Maldives			36	N/A	N/A		N/A	N/A	Asia Pacific
95	Sri Lanka			36	37	38		37	40	Asia Pacific
101	Gabon			35	34	37		34	35	Sub Saharan Africa
101	Niger			35	34	35		34	33	Sub Saharan Africa
101	Peru			35	36	38		38	38	Americas
101	Philippines			35	35	38		36	34	Asia Pacific
101	Thailand			35	38	38		35	37	Asia Pacific
101	Timor-Leste			35	28	28		30	33	Asia Pacific
101	Trinidad and Tobago			35	39	38		38	39	Americas
108	Algeria			34	36	36		36	34	Middle East and North Africa
108	Côte d´Ivoire			34	32	32		27	29	Sub Saharan Africa
108	Egypt			34	36	37		32	32	Middle East and North Africa
108	Ethiopia			34	33	33		33	33	Sub Saharan Africa
108	Guyana			34	29	30		27	28	Americas
113	Armenia			33	35	37		36	34	Europe and Central Asia
113	Bolivia			33	34	35		34	34	Americas
113	Vietnam			33	31	31		31	31	Asia Pacific
116	Mali			32	35	32		28	34	Sub Saharan Africa
116	Pakistan			32	30	29		28	27	Asia Pacific
116	Tanzania			32	30	31		33	35	Sub Saharan Africa
116	Togo			32	32	29		29	30	Sub Saharan Africa
120	Dominican Republic			31	33	32		29	32	Americas
120	Ecuador			31	32	33		35	32	Americas
120	Malawi			31	31	33		37	37	Sub Saharan Africa
123	Azerbaijan			30	29	29		28	27	Europe and Central Asia
123	Djibouti			30	34	34		36	36	Sub Saharan Africa
123	Honduras			30	31	29		26	28	Americas
123	Laos			30	25	25		26	21	Asia Pacific
123	Mexico			30	31	35		34	34	Americas
123	Moldova			30	33	35		35	36	Europe and Central Asia
123	Paraguay			30	27	24		24	25	Americas
123	Sierra Leone			30	29	31		30	31	Sub Saharan Africa
131	Iran			29	27	27		25	28	Middle East and North Africa
131	Kazakhstan			29	28	29		26	28	Europe and Central Asia
131	Nepal			29	27	29		31	27	Asia Pacific
131	Russia			29	29	27		28	28	Europe and Central Asia
131	Ukraine			29	27	26		25	26	Europe and Central Asia
136	Guatemala			28	28	32		29	33	Americas
136	Kyrgyzstan			28	28	27		24	24	Europe and Central Asia
136	Lebanon			28	28	27		28	30	Middle East and North Africa
136	Myanmar			28	22	21		21	15	Asia Pacific
136	Nigeria			28	26	27		25	27	Sub Saharan Africa
136	Papua New Guinea			28	25	25		25	25	Asia Pacific
142	Guinea			27	25	25		24	24	Sub Saharan Africa
142	Mauritania			27	31	30		30	31	Middle East and North Africa
142	Mozambique			27	31	31		30	31	Sub Saharan Africa
145	Bangladesh			26	25	25		27	26	Asia Pacific
145	Cameroon			26	27	27		25	26	Sub Saharan Africa
145	Gambia			26	28	29		28	34	Sub Saharan Africa
145	Kenya			26	25	25		27	27	Sub Saharan Africa
145	Madagascar			26	28	28		28	32	Sub Saharan Africa
145	Nicaragua			26	27	28		28	29	Americas
151	Tajikistan			25	26	23		22	22	Europe and Central Asia
151	Uganda			25	25	26		26	29	Sub Saharan Africa
153	Comoros			24	26	26		28	28	Sub Saharan Africa
154	Turkmenistan			22	18	17		17	17	Europe and Central Asia
154	Zimbabwe			22	21	21		21	20	Sub Saharan Africa
156	Cambodia			21	21	21		20	22	Asia Pacific
156	Democratic Republic of Congo			21	22	22		22	21	Sub Saharan Africa
156	Uzbekistan			21	19	18		17	17	Europe and Central Asia
159	Burundi			20	21	20		21	19	Sub Saharan Africa
159	Central African Republic			20	24	24		25	26	Sub Saharan Africa
159	Chad			20	22	22		19	19	Sub Saharan Africa
159	Haiti			20	17	19		19	19	Americas
159	Republic of Congo			20	23	23		22	26	Sub Saharan Africa
164	Angola			18	15	19		23	22	Sub Saharan Africa
164	Eritrea			18	18	18		20	25	Sub Saharan Africa
166	Iraq			17	16	16		16	18	Middle East and North Africa
166	Venezuela			17	17	19		20	19	Americas
168	Guinea-Bissau			16	17	19		19	25	Sub Saharan Africa
169	Afghanistan			15	11	12		8	8	Asia Pacific
170	Libya			14	16	18		15	21	Middle East and North Africa
170	Sudan			14	12	11		11	13	Middle East and North Africa
170	Yemen			14	18	19		18	23	Middle East and North Africa
173	Syria			13	18	20		17	26	Middle East and North Africa
174	Korea (North)			12	8	8		8	8	Asia Pacific
175	South Sudan			11	15	15		14	N/A	Sub Saharan Africa
176	Somalia			10	8	8		8	8	Sub Saharan Africa
2016 Rank		Country	2016 Score				2015 Score				2014 Score	2013 Score		2012 Score	Region

DOORASHOOYINKA MADAXTINNIMADA IYO SIDAY U SAAMEEYEEN DALALKA AFRIKA EE SAXAARAHA KA HOOSEEYA (Sub-saharan Africa)

Mawduuca ugu weyn ee uu ololaha doorashooyinka Afrika ka midaysanyahay waa la dagaalanka Musuq-maasuqa. Sida ay shucuubta Afrika uga dharagsanyihiin, inuu Musuq-maasuqu yahay caqabadda laf dhabarta u ah faqriga baahsan, tayo-xumada adeegyada dawladeed, colaadaha iyo aqoondarrada hoos u dhigtay noloshooda.

Wadanka Ghana ayaa hoos uga dhacay kaalintii uu kaga jiray Xakamaynta Musuq-maasuqa sannadkii hore.Waxaana codbixintii doorashooyinka ee dalkaasi, laga arkayay sida ay dadweynaha dalkaasi ay khaatiga uga taaganyihiin, musuq-maasuqa ay madaxda dawladdooda caadaysteen, oo halkii ugu darnaa abid gaadhay. Wadamada Koonfur Afrika oo kobiciisa dhaqaale intan danbe taagnaa, ayaa isna kamida dalalka hoos uga dhacay heerkii ay kaga jireen La dagaalanka Musuq-maasuqa. Joseph Kabilaha Koongo, iyo Yahya Jamaca xukuma dalka Ghambiya, oo labadooduba sannadkii tagay ku guuldarreystay tar-tankii Madaxtannimada, ayaa ina tusaya sida uu nidaamka doorashooyinka ee Dimuqraadiyaddu uu u noqday caqabad ka hortimid xukuumadihii ku caanbaxay musuq-maasuqa.

WADAMA UGU WANAAGSAN

Dalalka Cape De Verde iyo Sao Tome and Pricipe, ayaa la sheegay inay yihiin wadamada hagaajiyay maamulkooga, ama la odhan karo tallaabooyin la dareemi karo ayay hore uga sii qaadeen sidii ay musuq-maasuqa u dhimi lahaayeen sannadkii hore ee 2016. Labada dalba waxay sannadkaasi galeen tar-tan doorasho oo madaxtooyo, Waxaanay xusid mudan inay kormeerayaashii caalamku ay Doorashadii Madaxtooyada ee ka dhacday Cape De Verde sannadkii hore ay ku tilmaameen mid tusaale wanaagsan u noqon karta qaaradda inteeda kale. Waxaana la sheegay in uu Madaxweynaha dalkaasi, Jorge Carlos Fonsenca uu ku mutaystay inay shacabkiisu dib-u-doortaan, iyagoo ku abaalmarinaya isbadallada uu dib-ugu-habeeyay qaabdhismeedka hayadaha maamul iyo Nidaamka ay ku hawlgalaanba guud ahaan.

Transparency International 2016 report: Jaantuska 3-aad.

Dalalka Sao Tome and Principe ayaa isaguna  qabsaday doorashadiisii madaxtooyada sannadkii hore, ayaa isna Maamulkii ka talinayay u taabogaliyay isbadal wanaagsan oo lagu sameeyay hannaankii xukuumadeed ee jiray. Isbaddalkaasi oo xujo ku noqonayaa Maamullada kale ee qaaradda ka jira. 

WADAMADA UGU DARAN. 

Walaw ay Ghani kamid tahay dalalka ay Qaaradda Afrika inteeda kale ku hirato, markay xagga dimuqraadiyadda noqoto, ayaa ay warbixinta ay soo saartay Hay'adda Caalamiga ah ee Daahfurnaanta Maamulada Dawladaha qiimeysa, ay sheegaysaa inay iyada 6 dal oo kale oo Afrikaan ahi ay kaalintii ay kaga jireen La dagaalanka Musuq-maasuqa, ay hoos uga dhaceen, Waxaanu Musuq-maasuqa dalka Gaani gaadhay, heer ay dadweynuhu ka adkeysan waayeen halkuu marayay, isla markaana ay cadhadoodii kula dhaceen Madaxweynihii talada hayay, kaasi oo markii ugu horreysay noqonaya madaxweynihii reer Ghana ee isagoo talada haya kuu guuldarraysta inuu hanto codka shacabkiisa. 

Dawladaha kale ee la filayay inay wax ka qabtaan musuq-maasuqa, ee ku guuldarreystay inay keenaan dhibcihii loogu talogalay, waxa kamida Dalka Koonfur Afrika, Nayjeeriya, Tanzaniya iyo Kiiniya.  Jakob Suma oo ah Madaxweynaha Koonfur Afrika ayay Dacwad Musuq-maasaqa la xidhiidhaa ay kaga socotaa dalkiisa, isla markaana ay warbaahintu qaadaa-dhigaysaa Fadeexadaha musuq-maasuq ee waayadan danbe dul-hoganaya.

Dalka Kiiniya oo isku dayay inuu qaado tallaabooyin uu xakameeyo musuq-maasuq baahsan ee aafeeyay xukuumaddiisa, sidoo kalana ansixiyay Xeer Dammaanad Qaadaya Xaqa ay Dadku u Leeyihiin inay ka war-helaan Waxqabadyada iyo Barnaamijyada Maaliyadeed ee Hay'adaha Dawladda (Right to Information Act), ayaan isna meel fog soo socda. Waxaanu musuq-maasuqu noqday jahwareerkii ugu weynaa ee lasoo darsay Madaxweyne Uhuru Kenyata, markii ay dib-u-qaabayntii Maamul ee uu sameeyay, ay wax natiija ka keeni weyday dadaalkii musuq-maasuq xakamaynta (2017). Jaahwarerkiisaasi oo aad looga dareemay, tar-tankii doorashooyinka ee uu sannadkan galay  oo uu musuq-maasuqu ahaa guuldarrooyinka ugu waaweyn ee loo tiriniyay hoggaankiisa. 

Waxaana Qiimeynta lagu sameeyay dalalka Afrika ee Saxaaraha ka hooseeya, qiimeynta lagu sameeyay kamida Dalka Somaliland, oo ay Isaga iyo Somaliyaba kaga jiraan Kaalinta ugu hoosaysa marka la eegayo, heerka Daahfurnaanta Nidaamka Xukuumadeed iyo Xakamaynta musuq-maasuqa.

MAXAA LOO BAAHANYAHAY IN LA SAMEEYO?

Waxa su'aashaasi sare ka jawaabaysa, daraasaddan ay diyaarisay 2016-kii, Hayadda U Ololoaysa Daahfurnaanta Nidaamyada Xukuumadeed ee Dawladaha ee loo yaqaan (Transparency International). Waxayna warbixintani talo ahaan usoo jeedinaysaa, inay Madaxweynayaasha ku ololeeyay La-dagaalanka Musuq-maasuq (Anti Corruption ticket) ee ballanqaadkoogaasi ay dadweynuhu kursiga ku geeyeen, inay ballanqaadkoogaasi u baddalaan ficil oo laga arko Nidaamka shaqo ee Xukuumadahooda. Taasi oo u uga baahan,  inay iyagoo raacaya mabadi'da Maamul-wanaagga, iyo Dimuqraadiyada  iyo Xuquuqda Aadamaha, ay dib-uqaabayn ku sameeyaan qaabdhismeedka sharciyeed ee haylkalka maamul ku dhisanyahay (Bureaucratic restructuring)   Waxaana tilmaamaya in ay ka dhab sheegayaan Ballanqaadyadii Musuq-maasuq Xakamaynta iyo  in kale, marka la qiimeeyo doorka iyo awoodaha ay siiyaan Haya'daha ku shaqada leh La-xisaabtanka iyo Dabagalka Waaxda fulinta (Institutions that hold governments accountable). Hay'adahaasi oo ay kamid yihiin: Bangiga Dhexe, Hantidhawarka iyo Xisaabaadka, Guddiyada Dabagala Musuq-maasuqa, Saxaafadda madaxbannaan, iwm.

Sidaa darteed waxa lagula taliyay inay madaxdaasi xoojiyaan, hayadahaasi Nidaamka Xukuumadeed ku ilaalinaya xeyndaabkooga, iyagoo hirgalinaya Nidaam Sharciyeed oo awood-u-siinaya inay si madaxbannaan, oo qaabaysan (systematic) u fuliyaan hawlahooga baadhiseed, Taasi oo ay kamid tahay inay Madaxda iyo hawl-wadeennada hay'adahaasi ay helaan dammaanad xileed oo muddaysan, isla markaana loo abuuro Nidaam Sharciyeed oo ku qasbaya hay'adaha kale inay la shaqeeyaan una hogaansamaan amaradooda iyo tilmaamaha (guidelines) ay kolba usoo jeediyaan laamaha fulinta.

Garyaqaan Maxamed Axmed Cabdi Bacaluul (waddi12@gmail.com)